យុវជន ផា ស៊ីវផេង រៀនចប់អនុបណ្ឌិតច្បាប់ និងទទួលអាហារូបករណ៍ទៅរៀនក្រៅប្រទេស តែលះប​ង់ចោល សុខចិត្តចូលបម្រើទ័ពការពារទឹកដី និងឈរជើងនៅសមរភូមិប្រាសាទខ្នា

លោកស្រី ស្រូយ សុជាតិ អគ្គនាយក នៃអគ្គនាយកដ្ឋានយុវជន នៃក្រសួងអប់រំ យុវជន និងកីឡា បានបង្ហាញនូវការគោរព និងកោតសរសើរយុវជន ផា ស៊ីវផេង ដែលលះបង់ឱកាសទទួលបានអាហាររូបករណ៍ ដើម្បីបន្ដការសិក្សានៅក្រៅប្រទេស ក្រោយចប់អនុបណ្ឌិតច្បា​ប់នៅក្នុងស្រុក ដោយសុខចិត្តចូលបម្រើជាកងទ័ពជួរមុខវិញ ដើម្បីការពារទឹកដី ក្នុងពេលប្រទេសមានសង្គ្រាមព្រំដែនជាមួយថៃ។

ក្នុងបទបង្ហាញស្តីពី យុវជន និងការកសាងស្មារតីស្នេហាជាតិ នៃសន្និបាតបូកសរុបការងារអប់រំ យុវជន និងកីឡា ឆ្នាំចាស់ និងលើកទិសដៅការងារឆ្នាំថ្មី នៅថ្ងៃទី១២ ខែកុម្ភៈ ឆ្នាំ២០២៦, លោកស្រី ស្រូយ សុជាតិ បានលើកឡើងថា ផា ស៊ីវផេង កាលពីឆ្នាំ២០១៩ គឺជាយុវជនស្ម័គ្រចិត្ដម្នាក់នៅក្នុងកម្មវិធី «ជុំរំយុវជនជាសកល» ដែលបានកើតឡើង នៅខេត្ដព្រះវិហារ។