សិស្សកម្ពុជា ១៣ រូប ដណ្ដើមបានមេដាយមាស ប្រាក់ សំរឹទ្ធ និងពានរង្វាន់ជាច្រើន ពីការប្រកួតលំដាប់ពិភពលោកនៅចក្រភពអង់គ្លេស

វាពិតជាដំណឹងដ៏គួរឱ្យមោទនភាពបំផុត ដែលសិស្សានុសិស្សកម្ពុជាចំនួន ១៣ រូប បានបង្កើតសមិទ្ធផលដ៏ត្រចះត្រចង់នៅលើឆាកអន្តរជាតិ តាមរយៈការដណ្តើមបានមេដាយ និងពានរង្វាន់ជាច្រើនក្នុងកម្មវិធី «The Young Master Challenge Global Final 2026» ដែលប្រព្រឹត្តទៅនៅសាកលវិទ្យាល័យ Queen Mary នៃចក្រភពអង់គ្លេស។

ក្រោមការដឹកនាំក្រុមដោយ លោកបណ្ឌិតសភាចារ្យ ច័ន្ទ រ័ត្ន ទីប្រឹក្សាក្រសួងអប់រំ យុវជន និងកីឡា សិស្សកម្ពុជាបានបង្ហាញពីសមត្ថភាពដ៏ខ្លាំងក្លាប្រកួតប្រជែងជាមួយបេក្ខជនមកពី ៣៣ ប្រទេស ដោយទទួលបានជ័យលាភីលើវិញ្ញាសាប្រឡងផ្ទាល់ជាបុគ្គលចំនួន ៣ មេដាយមាស ៥ មេដាយប្រាក់ និង ៥ មេដាយសំរឹទ្ធ ព្រមទាំងវិញ្ញាសាប្រឡងជាក្រុមទទួលបានពានមាស ១ ពានប្រាក់ ១ និងពានសំរឹទ្ធ ១។ ជោគជ័យដ៏អស្ចារ្យនេះគឺជាសក្ខីភាពបញ្ជាក់ពីគុណភាព និងសមត្ថភាពរបស់ធនធានមនុស្សវ័យក្មេងកម្ពុជា ដែលបាននាំមកនូវកិត្តិយសជូនជាតិមាតុភូមិ៕